Cambio Climático
¿Que causa o cambio climático?
O cambio climático desencadeouse polo veloz crecemento das concentracións de gases de efecto invernadoiro (como son o dióxido de carbono ou o metano) na nosa atmosfera desde os inicios da era industrial ata os nosos días.
Os gases de efecto invernadoiro fican na atmosfera durante décadas atrapando a calor producida polo reflexo dos raios do Sol sobre a superficie terrestre. Deste xeito están a provoca-lo aumento medio da temperatura da superficie (quecemento global) terrestre e causando interrupcións coa estabilidade climática.
¿Cales son as principais fontes de gases de efecto invernadoiro das actividades humanas?
Existen varias fontes de gases de efecto invernadoiro, tanto naturais como de orixe humana. De entre estas últimas, as responsables do cambio climático, as principais son as liberadas á atmosfera pola combustión das enerxías fósiles, como son o carbón, o petróleo e mailo gas. Estes combustibles son empregados pola industria, polos automóbiles, polos avións, polos sistemas de calefacción nos nosos fogares… Xunto a estas, outro grupo importante de emisións atopan a súa orixe na deforestación e a gandaría intensiva.
¿Cales son os efectos observados do cambio climático?
Os impactos do cambio climático son xa obvios, aparecen en forma de ondas de calor, secas, inundacións, fames, cambios no comportamento de plantas e animais, alteracións nas estacións do ano, aumento do número e probabilidade de sucesos meteorolóxicos extremos…
¿Aumentan o diminúen as emisións en España?
Segundo indican os últimos datos oficiais (ano 2005), en España vertéronse á atmosfera 440 millóns de toneladas de dióxido de carbono. Esta cantidade representa un aumento de máis do 50% respecto ás emisións do ano 1990, e un incremento do 33% respecto ó compromiso de Quioto.
O forte crecemento das emisións en España fixo que sexa o país industrializado onde máis aumentaron as emisións nos últimos anos, sendo xa o cuarto maior emisor da UE e o máis afastado dos obxectivos de Quioto.
¿Que podemos facer?
A sociedade está a demandar accións urxentes que poñan freo ás emisións. Moitas persoas contribúen xa de forma individual adoptando condutas máis respetuosas co noso contorno.
No entanto, quen debe da-lo paso máis firme é o goberno e as diferentes forzas políticas, pois teñen na súa man o poder para crearen as normas necesarias que poñan freo ós problemas sociais e ambientais, e así debería ser fronte ó cambio climático.
Amigos da Terra reclama ó goberno e a tódolos representantes políticos un acordo para reduci-las emisións de gases de efecto invernadoiro no noso país cando menos un 2% cada ano, contribuíndo a logra-lo obxectivo europeo de menos do 30% en 2020. Isto daríanos a oportunidade real de evitar impactos máis graves.